ກອງປະຊຸມສະຫຼຸບວຽກງານປະຈໍາປີ 2018 ແລະ ຜ່ານແຜນການ ປະຈໍາປີ 2019 ລັດວິສາຫະກິດໄຟຟ້າລາວ

14-03-2019.



               ກອງປະຊຸມສະຫຼຸບວຽກງານປະຈໍາປີ 2018 ແລະ ຜ່ານແຜນການປີ2019 ຂອງລັດວິສາຫະກິດໄຟຟ້າລາວ(ຟຟລ) ໄດ້ໄຂຂື້ນລະຫວ່າງ ວັນທີ 12-13 ມີນາ 2019, ໂດຍການເປັນປະທານຂອງ ທ່ານ ປອ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່,  ມີຫົວໜ້າກົມ, ຮອງກົມ, ຄະນະອໍານວຍການໃຫຍ່ ຟຟລ, ຄະນະຝ່າຍ, ສາຂາທົ່ວປະເທດ ແລະ ແຂກທີ່ຖືກເຊີນເຂົ້າຮ່ວມ ເຊິ່ງພິທີໄດ້ຈັດຂື້ນທີ່ສໍານັກງານໃຫຍ່ ຟຟລ ນະຄອນຫຼວງວຽງຈັນ, ໃນກອງປະຊຸມ ທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ ຟຟລ ໄດ້ຂື້ນລາຍງານສະພາບລວມການດໍາເນີນທຸລະກິດໃນ 1 ປີຜ່ານມາ ມີບາງຕອນທ່ານໄດ້ກ່າວວ່າ: ຟຟລ ໄດ້ເອົາໃຈໃສ່ຈັດຕັ້ງປະຕິບັດວຽກງານ ຕາມທິດທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດຖະບານ ກໍ່ຄືການຊີ້ນໍາຂອງ ກະຊວງພະລັງງານ ແລະ ບໍ່ແຮ່, ພະນັກງານ-ກໍາມະກອນ ຟຟລ ໄດ້ສາມັກຄີຮ່ວມແຮງ ຮ່ວມໃຈ ສ້າງຂະບວນການຍາດໄດ້ຜົນງານຫຼາຍດ້ານ, ໂດຍສະເພາະ ການ​ຄຸ້ມ​ຄອງ​ບໍລິຫານ ແລະ ຈັດຕັ້ງ​ປະຕິບັດ​ບັນດາ​ໂຄງການທີ່​ເປັນ​ບຸລິ​ມະສິດ ​ທີ່ໄດ້ຖືກ​ຮັບ​ຮອງ ແລະ ອະນຸມັດ​ຈາກ​ລັດຖະບານ​ແລ້ວ​ ​ໃຫ້ປະກົດ​ຜົນ​ເປັນ​ຈິງ ​ແລະ ສໍາເລັດ​ເປັນ​ຮູ​ບປະ​ທຳ​ເຊັ່ນ: ການກໍ່​ສ້າງ​ແຫຼ່ງຜະລິດ, ກໍ່ສ້າງສາຍສົ່ງ-ສະຖານີໄຟຟ້າ, ການຂະຫຍາຍຕາຂ່າຍໄຟຟ້າອອກສູ່ຊົນນະບົດ, ການຊື້-ຂາຍພະລັງງານໄຟຟ້າກັບປະເທດໃກ້ຄຽງຢ່າງມີປະສິດທິພາບ, ຄຸ້ມຄອງບຳລຸງຮັກສາລະບົບໄຟຟ້າ ເພື່ອຮັບໃຊ້ສັງຄົມໃນຂອບເຂດທົ່ວປະເທດ ໃຫ້ມີປະສິດທິຜົນ, ແກ້ໄຂຜົນກະທົບຈາກໄພພິບັດທາງທໍາມະຊາດ, ຜັນຂະຫຍາຍຄໍາສັ່ງ 02/ນຍ ໂດຍຫຼຸດຜ່ອນຂັ້ນຕອນ ແລະ ໄລຍະເວລາການບໍລິການຕິດຕັ້ງໄຟຟ້າ ແລະ ປັບປຸງລະບົບການໃຫ້ບໍລິການໄຟຟ້າໃຫ້ວ່ອງໄວ ໂປ່ງໃສ ແລະ ໄດ້ມາດຕະຖານ. ໃນປັດຈຸບັນ ທົ່ວປະເທດ ມີແຫຼ່ງຜະລິດໄຟຟ້າ ທັງໝົດ 69  ແຫ່ງ ລວມທັງ IPP, SPP ເຊິ່ງມີກຳລັງຕິດຕັ້ງ  ທັງໝົດ 7.000,14 MW, ໃນນັ້ນປະກອບມີ: 22 ເຂື່ອນ ເປັນຂອງ IPP ມີກຳລັງຕິດຕັ້ງ ທັງໝົດ 6.018 MW, ໃນນີ້ ແມ່ນສະໜອງໃຫ້ ຟຟລ ຈໍານວນ 1.552 MW ສ່ວນທີ່ເຫຼືອ 4.466 MW ແມ່ນສົ່ງອອກຕ່າງປະເທດໂດຍກົງ, ມີ 24 ເຂື່ອນ ເປັນຂອງ SPP ມີກຳລັງຕິດຕັ້ງ 152,93 MW, ສະໜອງໃຫ້ ຟຟລ. ມີ 12 ເຂື່ອນ ເປັນຂອງ ຜ-ຟຟລ ມີກໍາລັງຕິດຕັ້ງ 639 MW ສະໜອງໃຫ້ ຟຟລ ແລະ 11 ເຂື່ອນ ເປັນຂອງ ຟຟລ ມີກໍາລັງຕິດຕັ້ງ 190,21 MW, ແຜນສູ້ຊົນ 2019 ແມ່ນໄດ້ອີງໃສ່ຄໍາຂັວນທີ່ວ່າ “ເພີ່ມລາຍຮັບ ຫຼຸດລາຍຈ່າຍ, ຈໍາໜ່າຍໄຟໃຫ້ພຽງພໍ, ບໍລິການໄວ ດ້ວຍຄວາມປອດໄພ ຊົມໃຊ້ໃຫ້ເກີດຜົນ” ເປັນຕົ້ນ: ລະບົບການເງິນ, ການບໍລິການ, ສ້າງພະນັກງານສືບທອດ, ການຊື້-ຂາຍໄຟຟ້າ, ການພັດທະນາໂຄງການ ແລະ ກອງປະຊຸມກໍ່ໄດ້ປິດລົງໃນຕອນແລງຂອງວັນທີ 13 ມີນາ 2019 ດ້ວຍຜົນສໍາເລັດ.