ກອງປະຊຸມໃຫຍ່ ຄັ້ງທີ XV ຂອງໜ່ວຍຮາກຖານ ຊາວໜຸ່ມ ປະຊາຊົນ ປະຕິວັດລາວ ລັດວິສາຫະກິດໄຟຟ້າລາວ

22-02-2019.



   ກອງປະຊຸມໃຫຍ່ ຄັ້ງທີ XV ຂອງໜ່ວຍຮາກຖານ ຊາວໜຸ່ມ ປະຊາຊົນ ປະຕິວັດລາວ ລັດວິສາຫະກິດໄຟຟ້າລາວ ໄດ້ໄຂຂື້ນຢ່າງເປັນທາງການ, ໂດຍການເປັນປະທານ ຂອງ ສະຫາຍ ດຣ ສີມອນ ພິຈິດ ເລຂາຄະນະຊາວໜຸ່ມ ປະຊາຊົນປະຕິວັດລາວ ກະຊວງພະລັງງານ ແລະ ບໍ່ແຮ່, ສະຫາຍ ບຸນອູ້ມ ສີວັນເພັງ ເລຂາຄະນະພັກຮາກຖານ ທັງເປັນຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ມີສະຫາຍເລຂາໜ່ວຍຊາວໜຸ່ມຮາກຖານ ຊປປລ ຟຟລ ພ້ອມຄະນະ, ສາມອົງການຈັດຕັ້ງມະຫາຊົນ, ຄະນະໜ່ວຍ, ສະມາຊິກຊາວໜຸ່ມ ແລະ ແຂກທີ່ຖືກເຊີນເຂົ້າຮ່ວມ 600 ກວ່າສະຫາຍ. ພິທີໄດ້ຈັດຂື້ນໃນຕອນເຊົ້າຂອງວັນທີ 22 ກຸມພາ 2019 ຢູ່ທີ່ ສໍານັກງານໃຫຍ່ ລັດວິສາຫະກິດໄຟຟ້າລາວ(ຟຟລ) ນະຄອນຫຼວງວຽງຈັນ, ໃນພິທີ ສະຫາຍ ກຽງສັກ ປັຣກສາດທອງ ເລຂາໜ່ວຍຮາກຖານ ຊປປລ ຟຟລ ໄດ້ຂື້ນຜ່ານບົດລາຍງານການເຄື່ອນໄຫວວຽກງານໃນໄລຍະ 5 ປີ (2013-2018) ມີບາງຕອນສະຫາຍໄດ້ກ່າວວ່າ: ໜ່ວຍຮາກຖານ ຊປປລ ຟຟລ ແມ່ນໜ່ວຍໜຶ່ງ ໃນ 3 ອົງການຈັດຕັ້ງມະຫາຊົນ ທີ່ນອນໃນລະບົບການຈັດຕັ້ງຂອງ ຟຟລ ພາຍໃຕ້ການຊີ້ນໍາ ນໍາພາຂອງຄະນະພັກຮາກຖານ ຟຟລ ມີພາລະບົດບາດ ແລະ ໜ້າທີ່ ໃນການເຕົ້າໂຮມຄວາມສາມະຄີ, ການຈັດຕັ້ງ, ສຶກສາອົບຮົມ ແລະ ພັດທະນາຊາວໜຸ່ມໃນທຸກດ້ານເພື່ອສ້າງເປັນກໍາລັງແຮງພື້ນຖານ ໃນການປະຕິບັດວຽກງານວິຊາສະເພາະ ເປັນກໍາລັງປະຈັນບານ ແລະ ເປັນກໍາລັງໜູນທີ່ໄວ້ໃຈຂອງພັກ ກາຍເປັນຜູ້ສືບທອດພາລະກິດຂອງພັກ ຂອງຊາດ ເປັນຕົວແທນໃຫ້ແກ່ສິດ ແລະ ຜົນປະໂຫຍດອັນຊອບທໍາຂອງຄົນຮຸ້ນໃໝ່. ຫຼັງຈາກນັ້ນ ກອງປະຊຸມກໍ່ໄດ້ມີການບ່ອນບັດຄັດເລືອກເອົາ ຄະນະບໍລິຫານງານ ໜ່ວຍຮາກຖານ ຊປປລ ຟຟລ ຊຸດໃໝ່ ຈໍານວນ 15 ສະຫາຍ ຈາກ 19 ສະຫາຍ ພາຍຫຼັງບ່ອນບັດສໍາເລັດ ກອງປະຊຸມເຫັນດີຮັບຮອງເອົາ 5 ສະຫາຍເປັນຄະນະປະຈໍາ ສະຫາຍ ກຽງສັກ ປັຣກສາດທອງ ເປັນເລຂາ, ສະຫາຍນາງ ອາລິວັນ ພົມພິພັກ ເປັນຮອງ, ສະຫາຍ ພຸດທະສອນ ອິນທະວົງ ເປັນຮອງ, ສະຫາຍ ປາດຖະໜາ ທອງດີ ເປັນ ປະທານກວດກາ ແລະ ສະຫາຍ ແສງດາບ ແສງສຸວັນ ປະທານດ້ານການເງິນ, ໃນຕອນທ້າຍຂອງກອງປະຊຸມກໍ່ໄດ້ຮັບຟັງການໂອລົມຂອງ ສະຫາຍ ດຣ ສີມອນ ພິຈິດ ເລຂາ ຄຊປປລ ກະຊວງພະລັງງານ ແລະ ບໍ່ແຮ່, ຫຼັງຈາກນັ້ນ ສະໝຽນກອງປະຊຸມກໍ່ໄດ້ຂື້ນລາຍງານຜົນຂອງກອງປະຊຸມ ແລະ ພິທີກໍ່ໄດ້ປິດລົງດ້ວຍຜົນສໍາເລັດ.