ໂຄງການສາຍສົ່ງ 500 ກິໂລໂວນ ມອບເງິນ 3 ຕື້ກວ່າກີບ ໃຫ້ປະຊາຊົນຜູ້ໄດ້ຮັບຜົນກະທົບຈາກໂຄງການ



             ໃນວັນທີ 4 ສີງຫາ 2017, ຢູ່ທີ່ ຫ້ອງການປົກຄອງ ເມືອງສັງທອງ ນະຄອນຫຼວງວຽງຈັນ ໄດ້ມີພິທີມອບເງິນ 3 ຕື້ກວ່າ ກີບໃຫ້ກັບປະຊາຊົນ 16 ຄອບຄົວ ທີ່ໄດ້ຮັບຜົນກະທົບ ຈາກໂຄງການກໍ່ສ້າງສາຍສົ່ງ-ສະຖານີໄຟຟ້າແຮງສູງ 500 ກິໂລໂວນ(ກວ) ຊຽງຂວາງ-ນາຊາຍທອງ ໂດຍການເປັນປະທານຮ່ວມລະຫວ່າງ ທ່ານ ນາງ ແກ້ວ ພົມມະລາດ ຮອງເຈົ້າເມືອງໆ ສັງທອງ ແລະ ທ່ານ ບຸນມີ ພັນທະລັງສີ ຫົວໜ້າຝ່າຍກໍ່ສ້າງສາຍສົ່ງ-ສະຖານີ ລັດວິສາຫະກິດໄຟຟ້າລາວ ມີຄະນະກຳມະການຂັ້ນ ເມືອງ, ບ້ານ, ພະນັກງານ ຟຟລ ແລະ ປະຊາຊົນ ເຂົ້າຮ່ວມ.

            ໂຄງການກໍ່ສ້າງສາຍສົ່ງໄຟຟ້າແຮງສູງ 500 ກິໂລໂວນ(ກວ) ເປັນໂຄງການໃຫຍ່ ແມ່ນໄດ້ເລີ່ມການກໍ່ສ້າງ ວັນທີ 2 ກຸມພາ 2016-ເດືອນ ກຸມພາ 2019 ໃນມູນຄ່າ  622 ລ້ານ ກວ່າ ໂດລາສະຫະລັດອາເມລິກາ  ໂດຍແມ່ນທືນກູ້ຢືມຈາກທະນາຄານ Exim Bank ສປ ຈີນ ເຊີ່ງມີໄລຍະ 210 ກິໂລແມັດ ຈາກສະຖານີໄຟຟ້າ ບ້ານນາເພຍ ເມືອງ ຜາໄຊ ແຂວງ ຊຽງຂວາງ  ຫາ ສະຖານີໄຟຟ້າ ດານຊີ ເມືອງນາຊາຍທອງ, ນະຄອນຫຼວງວຽງຈັນ ໜ້າວຽກປະກອບດ້ວຍ: ກໍ່ສ້າງສາຍສົ່ງ 500 ກວ ວົງຈອນຄູ່ ແຂວງ ຊຽງຂວາງ ຫາ ເມືອງ ນາຊາຍທອງ ນະຄອນຫຼວງວຽງຈັນ, ກໍ່ສ້າງສາຍສົ່ງໄຟຟ້າແຮງສູງ  230 ກວ ວົງຈອນຄູ່  ແຕ່ ສະຖານີໄຟຟ້າດານຊີ ເມືອງນາຊາຍທອງ  ຫາ ສະຖານີ ນາຊາຍທອງ ມີຄວາມຍາວ  40 ກມ, ກໍ່ສ້າງສະຖານີໄຟຟ້າ 500/230 ກວ ໃໝ່ 1 ສະຖານີ ຢູ່ທີ່ ບ້ານນາເພຍ, ເມືອງຜາໄຊ, ແຂວງຊຽງຂວາງ, ກໍ່ສ້າງສະຖານີໄຟຟ້າ 500/230 ກວ ໃໝ່ ອີກ 1 ສະຖານີ ທີ່ບ້ານເພຍລາດ ເມືອງສັງທອງ ນະຄອນຫຼວງວຽງຈັນ ແລະ ຂະຫຍາຍ ສະຖານີໄຟຟ້າ 230/115 ກວ ນາຊາຍທອງ ເຊີ່ງຈະເປັນສາຍສົ່ງໄຟຟ້າແຮງສູງເພື່ອລໍາລຽງພະລັງງານໄຟຟ້າຈາກບັນດາເຂື່ອນເຊັ່ນ: ເຂື່ອນໄຟຟ້າສາຍນໍ້າຊໍາ 2 ແລະ 3, ເຂື່ອນໄຟຟ້ານໍ້າເນີນ, ເຂື່ອນໄຟຟ້ານໍ້າເປີນ, ໂຮງໄຟຟ້າຄວາມຮ້ອນຖ່ານຫີນ ຢູ່ເມືອງຫົວເມືອງ, ເຂື່ອນໄຟຟ້ານໍ້າງື່ມ 3 ແລະ 4 ແລະ ບັນດາເຂື່ອນທີ່ ຈະຜະລິດໄຟຟ້າໃນເຂດພາກເໜືອ ເພື່ອສົ່ງມາທີ່ນະຄອນຫຼວງວຽງຈັນ ແລະ ສ່ວນທີ່ເຫຼືອກໍ່ສົ່ງຂາຍໃຫ້ຕ່າງປະເທດ.