ກອງປະຊຸມສະຫຼຸບວຽກງານ 2016 ແລະ ຜ່ານແຜນການ 2017



       ໃນວັນທີ 7 ມີນາ 2017 ທີ່ຜ່ານມາ, ຢູ່ທີ່ສຳນັກງານໃຫຍ່ ລັດວິສາຫະກິດໄຟຟ້າລາວ(ຟຟລ) ນະຄອນຫຼວງວຽງຈັນ,   ໄດ້ມີກອງປະຊຸມສະຫຼຸບວຽກງານປະຈຳປີ 2016 ແລະ ຜ່ານແຜນການ 2017 ໂດຍການເປັນປະທານຂອງ ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ຟຟລ ແລະ ໃຫ້ກຽດເຂົ້າຮ່ວມຂອງ ທ່ານ ປອ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ມີຫົວໜ້າກົມ ຮອງກົມ, ຄະນະອຳນວຍການ, ຄະນະຝ່າຍ, ຄະນະສາຂາ, ຫ້ອງການ ແລະ ແຂກທີ່ຖືກເຊີນ ເຂົ້າຮ່ວມ. ໃນກອງປະຊຸມ ທ່ານ ບຸນອູ້ມ ສີວັນເພັງ ອຳນວຍການໃຫຍ່ ຟຟລ ໄດ້ຂື້ນລາຍງານສະພາບລວມໂດຍຫຍໍ້ ການບໍລິຫານວຽກງານ ໃນປີ 2016  ເຊີ່ງໃນນັ້ນ ຟຟລ ກໍ່ສາມາດຍາດໄດ້ຫຼາຍດ້ານທີ່ພົນເດັ່ນ ໂດຍສະເພາະແມ່ນ ການຄຸ້ມຄອງ, ການສະໜອງພະລັງງານ, ການບຳລຸງຮັກສາລະບົບໄຟຟ້າ ຮັບປະກັນສະຖຽນລະພາບ ເພື່ອສະໜອງພະລັງງານໄຟຟ້າໂດຍສະເພາະ ເຫດການເດັ່ນໆ ຂອງຊາດຄື: ກອງປະຊຸມສຸດຍອດອາຊ່ຽນໃນລະດັບຕ່າງໆ ທີ່ໄດ້ຈັດຂື້ນທີ່ ນະຄອນຫຼວງວຽງຈັນ ພ້ອມນັ້ນ ກໍ່ໄດ້ສືບຕໍ່ຄົ້ນຄ້ວາຊອກຫາແຫຼ່ງທຶນ ເພື່ອພັດທະນາລະບົບໄຟຟ້າໃຫ້ມີການຂະຫຍາຍໂຕຢ່າງຕໍ່ເນື່ອງ ເພື່ອໃຫ້ຕອບສະໜອງໄດ້ຕໍ່ແຜນຢຸດທະສາດຂອງ ພັກ-ລັດ ທີ່ວາງ ໄວ້ ໃຫ້ເປັນຜົນຢ່າງແທ້ຈິງ. ປະຈຸບັນ ສປປລາວ ມີ 50 ເຂື່ອນ ລວມທັງ ເຂື່ອນ IPP, SPP ເຊີ່ງມີກໍາລັງຕິດຕັ້ງທັງໝົດ 6.385,41 ເມກາວັດ  ໃນນັ້ນປະກອບມີ 19 ເຂື່ອນທີ່ເປັນຂອງ IPP ມີກໍາລັງຕິດຕັ້ງ 5.701 ເມກາວັດ ມີ 13 ເຂື່ອນ ເປັນຂອງ SPP ມີກໍາລັງຕິດຕັ້ງ 57,70 ເມກາວັດ ແລະ ມີ 18 ເຂື່ອນ ທີ່ເປັນຂອງ ຟຟລ ແລະ ຜ-ຟຟລ ມີກຳລັງຕິດຕັ້ງທັງໝົດ 622,71 ເມກາວັດ, ລະບົບສາຍສົ່ງ 500 ກິໂລໂວນ ມີຄວາມຍາວ 167 ກິໂລແມັດ, ສາຍສົ່ງ 230 ກິໂລໂວນ ຍາວ 1.777,14 ກິໂລແມັດ ແລະ ສາຍສົ່ງໄຟຟ້າ 115 ກິໂລໂວນ ມີຄວາມຍາວ 6.968,23 ກິໂລແມັດ, ມີສະຖານີໄຟຟ້າ 230/115/22 ກິໂລໂວນ 6 ແຫ່ງ, ສະຖານີ ໄຟຟ້າ 115/22 ກິໂລໂວນ 54 ແຫ່ງ. ມາຮອດປະຈຸບັນ ເມືອງທີ່ໄດ້ຊົມໃຊ້ໄຟຟ້າແລ້ວ 148 ເມືອງ ເທົ່າ 100%, ຈຳນວນບ້ານ 8.544 ບ້ານ ມີໄຟຟ້າໃຊ້ຖາວອນ 7.554 ບ້ານ ຄິດເປັນ 88,41% ຈໍານວນຄອບຄົວ 1.167.607 ຄອບຄົວ ມີໄຟຟ້າໃຊ້ແລ້ວ 1.074.789 ຄອບຄົວ ຄິດເປັນ 92,05% ນອກຈາກວຽກງານຈັດຕັ້ງ ປະຕິບັດແລ້ວ ຟຟລ ຍັງມີແຜນສູ້ຊົນຫຼາຍດ້ານເຊັ່ນ: ວຽກຄຸ້ມຄອງລະບົບຜະລິດ, ຄຸ້ມຄອງລະບົບສົ່ງ, ລະບົບຈຳໜ່າຍ, ພັດທະນາໂຄງການເຂື່ອນ, ການຄຸ້ມຄອງລະບົບລາຍຮັບ-ລາຍຈ່າຍ, ວຽກງານເຕັກນິກ ແລະ ພັດທະນາບຸກຄະລາກອນ, ໃນຕອນທ້າຍຂອງກອງປະຊຸມກໍ່ຍັງໄດ້ຮັບຟັງການໂອລົມຂອງ ທ່ານ ລັດຖະມົນກະຊວງພະລັງງານ ແລະ ບໍ່ແຮ່ ແລະ ກອງປະຊຸມກໄດ້ອັດລົງດ້ວຍຜົນສໍາເລັດໃນຕອນແລງຂອງ ວັນທີ 7 ມີນາ 2017.