ທ່ານ ໂກມົນຈັນ ເພັດອາສາ ຮອງຜູ້ອຳນວຍການໃຫຍ່ ຟຟລ ເຂົ້າຮ່ວມສຸດຍອດກອງປະຊຸມ ການນຳໃຊ້ພະລັງງານ ຄັ້ງທີ 6 ທີ່ ເມືອງໜານໜິງ ສປ ຈີນ

19-09-2019.




    ໃນລະຫວ່າງວັນທີ 19-20 ກັນຍາ 2019 ທີ່ຜ່ານມາ ທ່ານ ໂກມົນຈັນ ເພັດອາສາ ຮອງຜູ້ອຳນວຍກາໃຫຍ່ ລັດວິສາຫະກິດໄຟຟ້າລາວ ໄດ້ເຂົ້າຮ່ວມກອງປະຊຸມສຸດຍອດ ການນຳໃຊ້ພະລັງງານຄັ້ງທີ 6 ແລະ ເວທີປຶກສາຫາລືການຮ່ວມມື-ການພັດທະນາພະລັງງານ ຈີນ-ອາຊຽນ 2019 ທີ່ ເມືອງ ໜານໜິງ ສປ ຈີນ ໂດຍການເປັນປະທານຂອງ ທ່ານ Bi Yaxiong ຮອງປະທານຕາຂ່າຍໄຟຟ້າພາກໃຕ້ຂອງຈີນ ມີ ຜູ້ບໍລິຫານຂັ້ນສູງຈາກ CSG, EDC, EGAT, EVN ແລະ MOEE. ເຊິ່ງກອງປະຊຸມດັ່ງກ່າວແມ່ນເປັນກອງປະຊຸມຂອງພາກພຶ້ນອາຊຽນ ໂດຍຈັດຂຶ້ນທຸກໆປີ ແລະ ໄດ້ໝູນວຽນກັນເປັນເຈົ້າພາບໃນການຈັດງານ ໂດຍປີນີ້ແມ່ນທາງ ສປ ຈີນ ເປັນເຈົ້າພາບ, ປີ 2020 ແມ່ນປະເທດກຳປູເຈຍ ແລະ ໃນປີ 2021 ແມ່ນປະເທດມຽນມາ ຈະເປັນເຈົ້າພາບ. ໂດຍມີປະເທດອາຊຽນເຂົ້າຮ່ວມຄື: ອິນໂດເນເຊຍ, ໄທ, ມາເລເຊຍ, ຟິລິບປິນ, ມຽນມາ, ລາວ, ຫວຽດນາມ, ກຳປູເຈຍ ແລະ ສິງກະໂປ. China Southern Power Grid Co., Ltd (CSG) ແລະ Eectricite Du Laos (EDL) ໄດ້ຮ່ວມມືກັນ ໃນປີ 2014, ເຊິ່ງ CSG ໄດ້ລິເລີ່ມກອງປະຊຸມສຸດຍອດການນໍາໃຊ້ພະລັງງານໄຟຟ້າ ແລະ ໄດ້ຮັບການຕອບສະໜອງໃນທາງບວກໂດຍບັນດາບໍລິສັດສາທາລະນະປະໂຫຍດອື່ນໆໃນລຸ່ມແມ່ນໍ້າຂອງ. ເຊິ່ງຈຸດປະສົງໃນການຈັດງານໃນຄັ້ງນີ້ກໍ່ເພື່ອເພີ່ມທະວີການແລກປ່ຽນ ແລະ ການຮ່ວມມືດ້ານວິຊາການ, ນອກນັ້ນພາຍໃນກອງປະຊຸມກໍ່ໄດ້ປຶກສາຫາລືກັນໃນຫຼາຍຫົວຂໍ້ເຊັ່ນ: ທັດສະນະກ່ຽວກັບການເຊື່ອມຕໍ່່ພະລັງງານໃນລຸ່ມແມ່ນໍ້າຂອງ, ຜົນກະທົບຂອງພະລັງງານໃນການເຊື່ອມໂຍງເຂົ້າໃນລະບົບໄຟຟ້າ ພ້ອມທັງວິທີແກ້ໄຂໃນການຫຼຸດຜ່ອນປະຊາກອນທີ່ຍັງບໍ່ເຂົ້າເຖິງໄຟຟ້າ ແລະ ໃນຕອນທ້າຍຂອງກອງປະຊຸມກໍ່ໄດ້ເຂົ້າຢ້ຽມຢາມວິຊາການທີ່ສູນບໍລິການລູກຄ້າຂອງ CSG ແລະ ສະຖານີສາກໄຟຟ້າສຳຫລັບພາຫະນະທີ່ແລ່ນດ້ວຍພະລັງງານໄຟຟ້າ ໃນເມືອງໜານໜິງ.