ກອງປະຊຸມ ດ້ານເຕັກນິກວິຊາການ ລະຫວ່າງ ລັດວິສາຫະກິດໄຟຟ້າລາວ (EDL) ແລະ ສະຫະບໍລິສັດໄຟຟ້າຫວຽດນາມ(EVN)

26-07-2019.



     ໃນຕອນເຊົ້າວັນທີ 25 ກໍລະກົດ 2019 ທີ່ ​ໂຮງແຮມ ທີແອສທີ ແຂວງ​ສະຫວັນ​ນະ​ເຂດ ​​ໄດ້ມີກອງ​ປະຊຸມ ​ແລກປ່ຽນ​ບົດຮຽນ​ທາງ​ດ້ານ​ເຕັກນິກ​ວິຊາ​ການ ລະຫວ່າງ ລັດ​ວິ​ສາ​ຫະກິດ​ໄຟຟ້າ​ລາວ (EDL) ​ແລະ ສະຫະ​ບໍລິສັດ​ໄຟຟ້າ​ຫວຽດນາມ (EVN) ໂດຍການເປັນປະທານ ຂອງທ່ານ ຄໍາປະເສີດ ເທບປັນຍາ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ແລະ ທ່ານ​ ຫວໍ ກວາງ ​ເລິ​ມ ຮອງຜູ້ອຳນວຍການສະຫະ​ບໍລິສັດ​ໄຟຟ້າ​ຫວຽດນາມ ເປັນປະທານຮ່ວມ ພ້ອມດ້ວຍຄະນະ ທັງ 2 ບໍລິສັດ ເຂົ້າຮ່ວມ 100 ຄົນ. ການພົວພັນ​ຮ່ວມ​ມື​ ລະຫວ່າງ ລັດຖະບານ​ຂອງ​ສອງ​ປະ​ເທດ ລາວ ​ແລະ ຫວຽດນາມ ​ພາຍ​ໃຕ້​ສາຍສຳພັນ​ການ​ຮ່ວມ​ມື ​ໃນ​ການ​ດຳ​ເນີນ​ທຸລະ​ກິດ​ ດ້ານ​ຂະ​ແໜງ​ພະລັງງານ​ໄຟຟ້າ ຜ່ານ​ມາ​ເກືອ​ບ 20 ປີ ຈາກ​ຈຸດ​ທີ 1 ມາ​ຮອດ​ຈຸດ​ທີ 7 ຂອງ​ການ​ເຊື່ອມ​ໂຍງ ການ​ຊື້​-ຂາຍ​ພະລັງງານ​ຮ່ວມ​ກັນ ດ້ວຍ​ລະບົບໄຟຟ້າ​ແຮງ​ກາງ 22 kV , 35 kV ​ແລະ​ ຈະກ້າວ​ໄປ​ເຖິງ​ລະບົບ​ແຮງ​ສູງ 220 kV ​ແລະ 500 kV ລະຫວ່າງ​ ສອງ​ຊາດ​ລາວ-​ຫວຽດນາມ ​ເວົ້າ​ລວມ, ​ເວົ້າ​ສະ​ເພາະ ​ແມ່ນ​ລະຫວ່າງ ລັດ​ວິ​ສາ​ຫະກິດ​ໄຟຟ້າ​ລາວ ​ແລະ ສະຫະ​ບໍລິສັດ​ໄຟຟ້າ​ຫວຽດນາມ. ​ຊຸມ​ປີ​ຕໍ່ໜ້າ ​ ຟຟລ ມີ​ສັນຍາ​ຊື້​-ຂາຍ​ໄຟຟ້າ ຈາກ​ບັນດາ​ໂຄງການ IPP/SPP ທີ່​ນັບ​ມື້​ນັບ​ເພີ້​ມຂື້ນ ​ແລ​ະ ​ໂດຍ​ສະ​ເພາະ​ບົດ​ບັນທຶກ​ກອງ​ປະຊຸມ ລະຫວ່າງ EDL ​ແລະ EVN ກ່ຽວ​ກັບ​ການ​ສົ່ງ​ຂາຍ​ໄຟ​ໃຫ້ ສສ ຫວຽດນາມ, ຊຶ່ງ​ໄດ້​ກຳນົດ​ໄລຍະ​ເວລາ​ການ​ສົ່ງ​ໄຟ​ໃນ​ ປີ 2020 ຈຳນວນ 1,000 MW, ປີ 2025 ຈຳນວນ 3,000 MW ​ແລະ ປີ 2030 ຈຳນວນ 5,000 MW, ພ້ອມກັນນັ້ນ ສປປ ລາວ ຈະໄດ້ສົ່ງກະແສໄຟຟ້າຈາກເຂື່ອນ​ໄຟຟ້າ​ນ້ຳ​ອູ 3, 4, 6 ​ແລະ 7 ຂາຍ​ໃຫ້ ສສ ຫວຽດນາມ. ໃນນັ້ນທັງແລກປ່ຽນບົດຮຽນດ້ານບຸກຄະລາກອນ ເຊັ່ນຍົກລະດັບໃນດ້ານພາສາຫວຽດນາມ ແລະ ດ້ານເຕັກນິກຄວາມປອດໄພໃນຫຼາຍຫົວຂໍ້. ໃນຕອນບ່າຍໃນວັນດຽວກັນໄດ້ມີແຂ່ງຂັນກິລາບານເຕະມິດຕະພາບ ລະຫວ່າງສອງບໍລິສັດຊື່ງ ທ້າຍເກມການແຂ່ງຂັນທັງ (EDL) ແລະ (EVN) ສາມາດເຮັດປະຕູ 1 ຕໍ່ 1 ເພື່ອເປັນການຮັດເແໜ້ນຄວາມສາມະຄີໄວ້ຕະຫຼອດໄປ.