ເວທີພົບປະເສວະນາ ອາດີດການນຳຊາວໜຸ່ມ ກັບຊາວໜຸ່ມຍຸກສະໄໜ

22-05-2019.



         ໃນຕອນເຊົ້າຂອງວັນທີ 22 ພຶດສະພາ 2019 ທີ່ຫ້ອງປະຊຸມໃຫຍ່ລັດວິສາຫະກິດໄຟຟ້າລາວ ນະຄອນຫຼວງວຽງຈັນ, ໄດ້ຈັດກອງປະຊຸມເວທີພົບປະ ອາດີດການນຳຊາວໜຸ່ມ ກັບຊາວໜຸ່ມຍຸກສະໄໜ ໃນຫົວຂໍ້ “ການເຕີບໃຫຍ່ ແລະ ການຂະຫຍາຍຕົວການຈັດຕັ້ງຊາວໜຸ່ມໃນຂະແໜງພະລັງງານ ແລະ ບໍ່ແຮ່” ໂດຍການ ເຂົ້າຮ່ວມຂອງ ສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີສະຫາຍ ທອງພັດ ອິນທະວົງ ຮອງເລຂາຄະນະພັກ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ສະຫາຍ ປອ ສີມອນ ພິຈິດ ຄະນະພັກກະຊວງ ກໍາມະການບໍລິຫານງານສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມ ກະຊວງ ພະລັງງານ ແລະ ບໍ່ແຮ່, ສະຫາຍ ດວງສີ ພາຣະຍົກ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ, ມີອາດີການນຳຊາວໜຸ່ມ ແລະ ສະມາຊິກຊາວໜຸ່ມອ້ອມຂ້າງກະຊວງພະລັງງານ ແລະ ບໍ່ແຮ່ເຂົ້າຮ່ວມ. ໃນພິທີໄດ້ມີການເລົ່າມູນເຊື້ອ ວັນສ້າງຕັ້ງຊາວໜຸ່ມ ຄົບຮອບ 64 ປີ (14/5/1955-14/5/2019), ການປັບປຸງບັນດາລະບຽບການ, ກົນໄກປະສານງານ, ການປັບປຸງຂອດການບໍລິການໄຟຟ້າ, ການກວດກາຄວາມປອດໄພຂອງເຂື່ອນ, ການຄຸ້ມຄອງການຂຸດຄົ້ນແຮ່ທາດ ແລະ ອື່ນໆ ພ້ອມກັນນັ້ນ ແຕ່ລະສະຫາຍ ຍັງໄດ້ມີຄໍາເຫັນຮ່ວມກັນຫຼາຍບັນຫາ ແຜນສູ້ຊົນ, ທິດທາງ ແຜນການພັດທະນາ ຊາວໜຸ່ມ, ເພີ່ມທະວີສຶກສາອົບຮົມ ການເມືອງ-ແນວຄິດ ສະຕິຕໍ່ລະບຽບກົດໝາຍ ແລະ ຄວາມຮູ້ທົ່ວໄປທີ່ເປັນປະໂຫຍດໃຫ້ກັບຊາວໜຸ່ມ, ປັບປຸງ ກໍ່ສ້າງການຈັດຕັ້ງຊາວໜຸ່ມໃຫ້ເຂັ້ມແຂງ ແລະ ຕອນທ້າຍຂອງພິທີກໍ່ໄດ້ມອບໃບຍ້ອງຍໍຈາກສູນກາງຊາວໜຸ່ມ ໃນຂະບວນການຊາວໜຸ່ມຕະລຸມບອນໃນການປະກອບສ່ວນໃນວຽກງານໄພພິບັດຢູ່ແຂວງອັດຕະປື ແລະ ກະຊວງພະລັງງານ ແລະ ບໍ່ແຮ່ ກໍ່ໄດ້ມອບອຸປະກອນໄຟຟ້າແສງ ຕາເວັນໃຫ້ສູນກາງຊາວໜຸ່ມ ເພື່ອໄປມອບໃຫ້ແກ່ ທະຫານຢູ່ເຂດຊາຍແດນ ຈຳນວນ 50 ຊຸດ ມູນຄ່າ 100 ລ້ານກີບ.